Tags

, , , ,

ఎంకెఆర్‌

    గతవారంలో జరిగిన స్పెయిన్‌ పార్లమెంట్‌ ఎన్నికలలో ఓటర్లు మరోసారి అన్ని పార్టీలను ఓడించారు. ఏడాది వ్యవధిలో జరిగిన రెండు ఎన్నికలలో ఏ పార్టీ లేదా కూటమికి సంపూర్ణ మెజారిటీ రాలేదు. గత ఎన్నికలతో పోల్చితే మితవాద, సోషలిస్టు పార్టీలు స్వల్పంగా ఓట్లను పెంచుకోగా, అక్కడి రెండు పార్టీల వ్యవస్ధను సవాలు చేస్తూ ముందుకు వచ్చిన వామపక్ష పోడెమోస్‌ పార్టీ గత ఎన్నికలతో పోల్చితే ఈ సారి పన్నెండు లక్షల ఓట్లను కోల్పోయింది, ఆరునెలల క్రితం 52లక్షలకుపైగా ఓట్లు తెచ్చుకుంది,విడిగా పోటీ చేసి తొమ్మిదిలక్షలకుపైగా ఓట్లు , రెండు సీట్లు తెచ్చుకున్న ఐక్య వామపక్ష పార్టీ ఈ సారి పోడెమోస్‌తో కలసి పోయింది. ఈ రెండు పార్టీల కూటమికి గతంలో మాదిరి 71సీట్లు వచ్చినప్పటికీ పన్నెండులక్షలకు పైగా ఓట్లు తగ్గటం తీవ్రమైన విషయం. ఎన్నికలకు ముందు మీడియా జోశ్యాలు పోడెమోస్‌ కూటమికి పాపులర్‌ పార్టీకి దగ్గరగా ఓట్లు వస్తాయనే (28.5, 26.6) రీతిలో సాగాయి. సోషలిస్టుల కంటే ఎక్కువ సీట్లు తెచ్చుకొని సంకీర్ణ ప్రభుత్వాన్ని ఏర్పాటు చేయనుందని కూడా కొందరు ఆశించారు. అందుకు విరుద్దంగా జరగటంతో పొడెమోస్‌ అవాక్కయింది. స్పెయిన్‌ పార్లమెంట్‌లో 350 స్ధానాలు వున్నాయి. గత రెండు ఎన్నికలలో ఓట్లు, సీట్ల వివరాలు ఇలా వున్నాయి.(ఓ. ఓట్లశాతం సీ.సీట్ల సంఖ్య)

            పార్టీ     ఓ     సీ    పార్టీ       ఓ     సీ   పార్టీ        ఓ     సీ

2015 పాపులర్‌ 28.7 123 సోషలిస్టు 22.0 90 పోడెమోస్‌ 24.38  71

2016 పాపులర్‌ 33.0 137 సోషలిస్టు 22.7 90 పోడెమోస్‌ 21.10  71

     పోడెమోస్‌ ఓట్లు గతంతో పోల్చితే తగ్గటం గురించి అనేక విశ్లేషణలు వెలువడుతున్నాయి.వాటితో కొందరు ఏకీభవించవచ్చు లేదా విభేదించవచ్చు, వామపక్ష శక్తులు వాటి మంచి చెడ్డలను మధించాల్సిన అవసరం వుంది. ఐరోపా యూనియన్‌లో నాలుగవ పెద్ద ఆర్ధిక వ్యవస్ధగా వున్న స్పెయిన్‌ తీవ్ర సమస్యలను ఎదుర్కొంటోంది. గత ఆరునెలలుగా ఆపద్ధర్మం తప్ప ప్రభుత్వం లేదు, ఇలా వున్నపుడే ఆర్ధిక పరిస్థితి మెరుగుపడిందని కొందరు చమత్కరించారు. ఎన్నికలలో ఏ పార్టీకి సంపూర్ణ మెజారిటీ రానిపక్షంలో పెద్ద పార్టీగా ఎన్నికైన వారిని ప్రభుత్వ ఏర్పాటుకు ఆహ్వానిస్తారు. బలపరీక్షలో అది పార్లమెంట్‌లో 50శాతానికి పైగా మెజారిటీ తెచ్చుకోవాలి. ఒకసారి విఫలమైతే రెండు నెలల్లో మరోసారి నిరూపించుకోవాలి. అది కూడా విఫలమైతే పార్లమెంట్‌ను రద్దు చేసి ఎన్నికలు నిర్వహిస్తారు. ఆ విధంగానే జూన్‌ 26న రెండవ సారి ఎన్నికలు జరిగాయి.ఈ సారి కూడా గత మాదిరే ఫలితాలు రావటం, చిన్న పార్టీలు కీలకంగా మారటంతో ఏ పార్టీ కూడా వాటి మీద ఆధారపడి ప్రభుత్వ ఏర్పాటుకు గతంలో ముందుకు రాలేదు. ఈ సారి పాపులర్‌ పార్టీ గతం ంటే 14 సీట్లు పెంచుకొని 137 తెచ్చుకున్నది, సంపూర్ణ మెజారిటీకి 186 మంది మద్దతు అవసరం.సోషలిస్టులు 85, పోడెమోస్‌ 71 మరో ఆరు పార్టీలు 57 స్థానాలు తెచ్చుకున్నాయి. ఎవరు ప్రభుత్వాన్ని ఏర్పాటు చేయాలన్నా సంకీర్ణం తప్ప మరొక మార్గం లేదు. తాము ప్రభుత్వ ఏర్పాటుకు ప్రయత్నాలు చేస్తున్నట్లు పాపులర్‌ పార్టీ ప్రకటించింది. గత యాభై సంవత్సరాల కాలంలో రెండు ప్రధాన పార్టీల ఆధిపత్యానికి గండిపడటం, రాజకీయ అనిశ్చిత పరిస్ధితి ఏర్పడటం ఇదే మొదటిసారి.

    ప్రస్తుతం ఏ పార్టీ మీదా విశ్వాసం లేదని స్పానిష్‌ ఓటర్ల తీర్పు స్పష్టం చేస్తున్నది. 2008లో ప్రారంభమైన ధనిక దేశాల ఆర్ధిక సంక్షోభం తరువాత జరిగిన ఎన్నికలలో ఒక్క గ్రీస్‌లో సిరిజా తప్ప ఏ పార్టీ కూడా రెండవ సారి వరుసగా అధికారానికి రాలేదు. ఈ స్థితిలో పొదుపు చర్యల పేరుతో అమలు జరుపుతున్న ప్రజావ్యతిరేక చర్యలను వ్యతిరేకించటం, అధికారానికి వచ్చిన తరువాత అదే పని చేయటంతో జనం మరో పార్టీని ఎంచుకుంటున్నారు. ఈ పూర్వరంగంలో స్పెయిన్‌లో 2011 నుంచి 2015 వరకు అధికారంలో వున్న పాపులర్‌ పార్టీ ప్రజావ్యతిరేక చర్యలతో జనానికి దూరమైంది. ప్రతిపక్షంగా వున్న సోషలిస్టు పార్టీ కూడా ఐరోపాలో మిగతా సోషలిస్టుల మాదిరే అధికారంలో లేనపుడు ప్రజల గురించి కన్నీరు కార్చటం, వచ్చిన తరువాత కార్పొరేట్ల సేవలో తరించటంతో ప్రత్యామ్నాయంగా ముందుకు వచ్చిన పొడేమోస్‌కు జనం మద్దతు ఇచ్చారు. గ్రీస్‌లో సిరిజా పార్టీతో దానిని పోల్చారు. అంతకు ముందు కమ్యూనిస్టులుగా వున్న వారు ఐక్య వామపక్ష పార్టీగా మారారు. తాజా ఎన్నికలలో వారు పోడెమోస్‌తో కలసి పోటీ చేశారు. అయినా రెండు పార్టీలకు కలిపితే గతంలో వచ్చిన వాటి కంటే పన్నెండు లక్షల ఓట్లను వారు కోల్పోయారు.పార్టీ ఏర్పాటు చేసిన కొద్ది నెలల్లోనే స్ధానిక సంస్ధల ఎన్నికలలో అనేక ఘన విజయాలు సాధించిన ఆ పార్టీ గత డిసెంబరులో తొలిసారి పార్లమెంట్‌కు పోటీ చేసినపుడు స్ధానిక సంస్ధలలో మాదిరి విజయం సాధించి అధికారానికి వస్తుందని, తిరుగులేని పార్టీగా ఎదుగుతుందని అతిగా అంచనాలు వేసుకున్నవారు దానికి అంత సత్తా లేదని డిసెంబరు ఫలితాలు వెల్లడి చేయటంతో నిరుత్సాహపడ్డారు.

    అవినీతి అక్రమాలతో గబ్బు పట్టిన పాపులర్‌, సోషలిస్టు పార్టీలనంటే జనం నమ్మటం లేదు, వామపక్ష పొడెమోస్‌ను ఎందుకు నమ్మటం లేదు, ఆరునెలల క్రితం కంటే ఓట్ల సంఖ్య ఎందుకు తగ్గిపోయిందన్నది చర్చ. వెంటనే వెలువడిన అభిప్రాయాల సారాంశం ఇలా వుంది. తటస్థంగా వున్న ఓటర్లు ఐరోపా యూనియన్‌ నుంచి బయటకు పోవాలని బ్రిటన్‌ ఓటర్ల తీర్పు తరువాత మితవాదులవైపు మొగ్గారు. ఆర్ధిక సంక్షోభం ఐరోపాలో నయా నాజీ శక్తులు పెరగటానికి దోహదం చేస్తున్నట్లు అనేక దేశాలలో ఆ శక్తులు తెచ్చుకున్న ఓటింగ్‌ స్పష్టం చేసింది. స్పెయిన్‌లో కూడా అదే ధోరణి వెల్లడి అయిందా? గ్రీస్‌లో సిరిజాతో విబేధించే కమ్యూనిస్టు పార్టీ అన్ని ఎన్నికలలో తన బలాన్ని నిలుపుకుంటున్నది తప్ప పెరగటం లేదు.కమ్యూనిస్టు పార్టీ నుంచి విడిపోయిన కొందరు, ఇతర వామపక్ష శక్తులతో కలసి ఏర్పడిన సిరిజా పార్టీ అధికారానికి వచ్చిన తరువాత అంతకు ముందు మితవాదులు అమలు జరిపిన ప్రజావ్యతిరేకచర్యలనే దాదాపుగా అమలు జరుపుతున్నదనే విమర్శలు రోజు రోజుకూ పెరుగుతున్నాయి. అక్కడి కార్మికవర్గం కూడా నిరసన తెలుపుతున్నది. తాము కూడా గ్రీస్‌ సిరిజా వంటి వారిమే అని చెప్పుకున్న పోడెమోస్‌కు మద్దతు ఇచ్చినా అదే పని చేస్తారా అని స్పెయిన్‌ ఓటర్లు భావించారా ? సంస్ధాపరంగా మిగతా పార్టీల మాదిరే అనుకున్నారా ? ఐక్య వామపక్ష పార్టీతో కలసి పనిచేయాలని చేసిన నిర్ణయం పొడెమోస్‌లో విబేధాలకు దారితీసింది.పాబ్లో ఇగ్లెసియాస్‌ తరువాత రెండవ స్ధానంలో నాయకుడిగా వున్న ఇనిగో ఎరెజాన్‌ మధ్య విబేధాలు వెల్లడయ్యాయి. పార్టీ కార్యదర్శిగా వున్న సెరిజియో పాస్కల్‌ను తొలగించారు.పాత వామపక్షవాదులు సోది చెబుతారు,నిరాశావాదంతో నిరుత్సాహాన్ని వ్యాపింపచేస్తారంటూ ఒక ఇంటర్వ్యూలో ఇగ్లెసియాస్‌ చులకనగా మాట్లాడాడు.నిరాశావాదం ఎంత మంచిది కాదో అతి అంచనా కూడా అంతే హాని చేస్తుందని గుర్తించలేకపోయారు. అన్ని రకాల ఓటర్లను ఆకర్షించాలనే వైఖరితో పొడెమోస్‌ నాయకత్వం పూర్వపు కమ్యూనిస్టులను చులకనగా మాట్లాడటం కొంత నష్టపరిచింది. పాబ్లో ఇగ్లెసియాన్‌ అహంకారపూరితంగా వ్యవహరిస్తారని ఓటర్లు భావించారా ? పొడెమోస్‌లో తమకు ప్రాధాన్యత లేకుండా పోయిందని వామపక్ష పార్టీ మద్దతుదార్లు, తమను సంప్రదించుకుండా పార్టీ ఎన్నికల ప్రణాళికలో వామపక్ష పార్టీ అంశాలను చేర్చారని ఇతర మద్దతుదార్లు అసంతృప్తి చెందిన కారణంగా పన్నెండులక్షల ఓట్లు తగ్గాయన్నది ఒక అభిప్రాయం.ఆరునెలల క్రితం పొడెమోస్‌కు గణనీయంగా సీట్లు కట్టపెట్టినప్పటికీ వారు చెప్పిన మార్పును తీసుకురావటానికి ఎలాంటి ప్రయత్నం చేయలేదన్న అసంతృప్తి కూడా ఓటర్లలో కలిగింది.వెనెజులా నుంచి నిధులు పొందారన్న ప్రత్యర్ధుల ప్రచారాన్ని తిప్పి కొట్టటంలో పొడెమోస్‌ నాయకత్వం జయప్రదం కాలేదా ?

   ఐక్య వామపక్ష పార్టీతో కూటమి కట్టక ముందే పొడెమోస్‌ మద్దతు పడిపోతున్నదని గుర్తించలేకపోయారు. పటిష్టమైన పార్టీ నిర్మాణం అవసరం లేదనే భావనతో పాటు దిగువ స్ధాయి నుంచి ప్రజాస్వామ్యం పేరుతో చేసిన ప్రయోగాలు, పై నాయకత్వపు అతి అంచనాలు, అంతర్గత కుమ్ములాటలు కూడా మద్దతు తగ్గటానికి దారి తీశాయి.గత ఎన్నికల తరువాత ఈ గందరగోళం మరింత పెరిగింది. సోషలిస్టులతో సంకీర్ణ కూటమి ప్రభుత్వ ఏర్పాటుకు ముందే తిరస్కరిస్తే ఒక పద్దతి, చర్చలు ప్రారంభించిన తరువాత అవి జయప్రదం కావాలన్న విధంగా పొడెమోస్‌ నాయకత్వం వ్యవహరించలేదు, కొందరు కావాలనే చెడగొట్టారనే భావం ఒక దశలో కలిగింది. వామపక్ష పార్టీ అనే బలమైన ముద్రతోనే అధికారానికి రావటం కష్టమనే అభిప్రాయానికి వచ్చిన నాయకత్వం మితవాద పార్టీల వెనుక వున్న ఓటర్లను కూడా ఆకర్షించేందుకు ప్రయత్నించారు. ఒక మాజీ సైనిక జనరల్‌ను ముందుకు తెచ్చారు. పొడెమోస్‌ వామపక్షం కాదు మితవాద పక్షం కాదు అని అతను ప్రచారం చేశాడు. గతంలో కమ్యూనిస్టులు దురహంకార జాతీయ వాద భావనలకు దూరంగా వున్నారు. పొడెమోస్‌ నాయకుడు ఇగ్లెసియాస్‌ మితవాదులను ఆకర్షించేందుకు నేను దేశ భక్తుడిని, నేను నా దేశం గురించి పాటు పడతాను అని చెప్పాడు. అదే సమయంలో వామపక్ష పార్టీ అనే అభిప్రాయాన్ని వ్యాపింపచేసేందుకు కూడా ప్రయత్నించారు. ఐక్యవామపక్ష పార్టీతో పాటు అనేక చిన్నా,చితకా వామపక్ష బృందాలను విలీనం చేసుకున్నారు.ఈ పరిణామం కూడా గత ఎన్నికల తరువాత సోషలిస్టులతో సంకీర్ణ ప్రభుత్వ ఏర్పాటుపై విబేధాలు తలెత్తటానికి దారితీసిందని చెబుతున్నారు.

     గతేడాది జరిగిన స్ధానిక సంస్ధల ఎన్నికలలో అనేక ముఖ్యపట్టణాలలో పొడెమోస్‌ నాయకులు మేయర్లుగా ఎన్నికయ్యారు. వారి పద్దెనిమిదినెలల పాలనాకాలంలో ఓటర్ల విశ్వాసాన్ని కోల్పోతున్నట్లు ఓటింగ్‌ తీరుతెన్నులు వెల్లడిస్తున్నాయి.మాడ్రిడ్‌, బార్సిలోనా వంటి చోట్ల వారే మేయర్లుగా వున్నారు. రెండులక్షల ఓట్లు ఈ పట్టణాలలో తగ్గాయి. అనేక చోట్ల అదే ధోరణి వెల్లడైంది.ఈ అభిప్రాయాలన్నీ ముందే చెప్పినట్లు లోతుగా విశ్లేషణ చేసి వెల్లడించినవి కాదు. పొడెమోస్‌ అధికారికంగా ఎన్నికల ఫలితాల గురించి ఎలాంటి విశ్లేషణా ఇంకా వెల్లడించలేదు. అయినప్పటికీ ప్రపంచంలోని వామపక్ష శక్తులన్నీ జనం విశ్వాసాన్ని చూరగొనే క్రమంలో ఈ అభిప్రాయాలను కూడా పరిగణనలోకి తీసుకొని తమ విధానాలు, ఎత్తుగడలు, ప్రవర్తనలను రూపొందించుకోవాల్సి వుంటుంది.

Advertisements